بريكولة: الخريطة الاجتماعية التفاعلية الجزائرية
بريكولة هو تطبيق اجتماعي جزائري الهدف تاعه باش يربط العالم الحقيقي بالعالم الرقمي، عن طريق خريطة تفاعلية يعيش فيها المستخدمين ويتفاعلو مع كلش لي داير بيه. بلا ما تبقى المعلومات، الخدمات، البلايص والحوايج مبعثرة بين مواقع التواصل، غروبات الميساجات ولا المعرفة الشخصية، بريكولة يجمعهم كامل في بلاصة وحدة باش يسهل الوصول لييهم ويستفاد الناس كامل.
الفكرة تاع بريكولة ساهلة خلاص: أي حاجة عندها بلاصة في الواقع يقدر يكون عندها بلاصة في الخريطة الرقمية. كي تكون تحوس على خدمة، حاب تحط مهمة، تعرف بالمحل التجاري تاعك، تعرض دار للبيع ولا للاكتراء، تشارك بلاصة سياحية أو تاريخية تستاهل الزيارة، تبليغي على حاجة ضاعتلك ولا تلقى غرض مفقود، ولا حتى تقترح موقع جديد باش يستفاد منو الاخرين، بريكولة يمدلك المساحة باش دير هذا الكل بكل سهولة.
التطبيق يركز بزاف على مساهمة المستخدمين باش يبنو المحتوى تاعه، يعني أي منشور، بلاصة ولا مهمة يزيدها شخص تولي معلومة تقدر تعون عبد واحد آخر في نفس المدينة ولا الحي. وبهكا المجتمع بنفسه يولي مصدر للمعلومات والخدمات، وكل مستخدم يولي جزء من شبكة تعاون الناس كامل.
في قسم المهام، أي واحد يقدر يحط واش خصو في دقايق معدودة، يحدد البلاصة ويكتب واش راه حاب، هكا الناس القريبين القادرين يديروا المهمة يشوفوها ويبعتو العروض تاعهم. الفكرة ماشي الطليق الطويل على عبد مناسب، بصح تخلي الحاجة توصل وحدها للعبد لي يقدر يقضيها.
زيد بزيادة، بريكولة يسمح لأصحاب المحلات باش يزيدو الحوانت تاعهم في الخريطة باش الناس تكتشفهم بسهولة، وأصحاب العقارات يحطو عروض البيع والكراء، والناس لي يحبو السياحة والثقافة يشاركو البلايص الطبيعية والتاريخية لي تساهل الزيارة، بلا ما نسناو القسم الخاص بالمفقودات لي يعاون باش نزيدو فرص نلقاو الأشياء الضايعة بفضل وقفة المجتمع.
واش يميز بريكولة هو أنه ماشي محدود في نوع واحد من الاستخدام، بل يتطور مع واش يحتاجو الناس. كلما تخرج فكرة جديدة تخدم المجتمع، تلقى بلاصتها داخل التطبيق، باش يولي منصة مفتوحة تربط الناس بالبلايص، الخدمات والمعلومات بطريقة ساهلة وعملية.
بريكولة تصمم باش يكون قريب للمستخدم الجزائري، بواجهة ساهلة وخريطة تفاعلية تخلي الوصول لوش تحتاجه أسرع وأوضح. الهدف ماشي يكون تطبيق زايد في التلفون، بصح باش يولي أداة يومية الناس تعتمد عليها في حياتهم، سواء للبحث، النشر، الاكتشاف، المساعدة ولا التواصل مع ناس حومتم وعشيرتهم.
الرؤية تاع بريكولة هي بناء أكبر خريطة اجتماعية تفاعلية في الجزائر، وين كل مستخدم يساهم في إثراء المحتوى، وتولي المعلومات المحلية أدق وأسهل للوصول. كل مهمة منشورة، كل محل مضاف، كل معلم سياحي، كل عقار، كل غرض مفقود، وكل بلاصة جديدة، تزيد قيمة حقيقية للمجتمع.
بريكولة ماشي مجرد تطبيق خدمات، هو منصة تربط الواقع بالعالم الرقمي، وتمد لكل واحد فرصة باش يساهم في بناء مجتمع متلاحم، وين المعلومة قريبة، الخدمة سريعة، البلايص ساهل باش تكتشفهم، والتواصل مع محيطك يولي أبسط. خاطر الحلول المليحة تبدأ كي الناس يشاركو واش يعرفو مع بعضاهم.